مين المستخدم وشنو مشكلته

الهدف

بعد هالدرس عندك جملة وحدة تحدد المستخدم والمشكلة، وتقدر تقولها لأي شخص بعشر ثواني ويفهم.

ليش هذا الحين؟

الـ PRD اللي بتكتبه بعد ثلاثة دروس بيكون مبني على هالجملة. ولو الجملة ضبابية، كل شي بعدها بيكون ضبابي — والـ AI اللي بينفّذ بيطلّع لك منتج ضبابي.

الـ AI ما يقرأ نيّتك. يقرأ اللي كتبته.

صيغة الجملة

[مستخدم محدد] يحتاج [نتيجة] لما [محفّز]،
لأن [سبب]. اليوم يسوّونها بـ [حل سيّء] وهذا [مشكلة الحل السيّء].

مثال ضعيف:

المستخدمين يبون طريقة أسهل يديرون فلوسهم.

من هذا ما تقدر تبني شي. مين؟ متى؟ ليش الحين؟

مثال قوي:

الموظف الكويتي اللي عنده أكثر من بطاقة يحتاج يعرف كم صرف على الأكل هالشهر لما يجيه راتبه ويحس إنه اختفى، لأنه يبي يوقف تسريب بدون ما يقعد يحسب. اليوم يفتح 3 تطبيقات بنكية ويجمع بالراس، وهذا ياخذ 20 دقيقة فيصير ما يسويه أصلا.

من هالجملة تقدر تبني. تعرف الشاشة الأولى، وتعرف متى ينفتح التطبيق، وتعرف شنو تقيس.